بوڑھی بہاراں؛ بیاسی سال کی ہوچکی تھی۔زندگی  کی بیاسی بہاریں دیکھنے کے بعد بھی اس کے حواس خمسہ میں ضعف کے آثار نظر نہیں آرہے تھے۔البتہ لاٹھی ٹیکنے کی عادی تھی اور کہا کرتی تھی کہ آدمی شہر کا ہو یا دیہات کا اسے گھر سے باہر جاتے وقت ہاتھ میں لاٹھی ضرور رکھنی چاہیے۔کیونکہ کیا معلوم کب کہاں کوئی بندر؛کتا؛بھینسہ؛بیل؛گھوڑا یا کوئی اور جانور حملہ آور ہوجائے۔اس کے چہرے کی جھریوں کی جھالر یہ عیاں کررہی تھی کہ وہ زندگی کے کئی نشیب وفراز دیکھ چکی ہے۔دو بیٹے اور دو بیٹیوں کی ماں تھی۔اس کا   رفیق حیات اپنا حق رفاقت ادا کرتے ہوئے بہت پہلے دنیا سے چل بسا تھا۔دونوں بیٹے وفادار بھی تھے اور خوشحال بھی۔اس کے پوتے پوتیوں اور نواسے نواسیوں تک کی شادی ہوچکی تھی۔اس کی آنکھوں نے اپنے قصبے کے راج محل کی زیب وزینت دیکھی تھی؛ راجکماروں کے پالنوں کو جھلایا تھا؛اپنے ملک کے بٹوارے کی خبر سن کر آنسو بہاے تھے اور پھر آدمی کی شکل میں حیوانی درندگی کا بھیانک رقص دیکھا تھا۔پھر ایک وقت اس کی زندگی میں ایسا بھی آیا تھا جب اس کی آنکھوں نے اپنے قصبے کے ویران وسنسان راج محل میں دور سے “جانی دشمن”فلم کی شوٹینگ دیکھی تھی۔زندگی کا اتنا تلخ وشیریں رس پینے کے باوجود بوڑھی بہاراں  کے چہرے سے نورانیت ٹپکتی تھی اور لب ولہجے میں بزرگانہ طمطراق موجود تھا۔لگتا تھا کہ زندگی اسے تھکا دینے میں ناکام ہوچکی ہے۔مقام حیرت تو یہ تھا کہ وہ اس عمر میں بھی نماز؛روزے اور ذکر واذکار کی پابند تھی۔قرآن پاک  پڑھنا نہیں جانتی تھی لیکن اس کے باوجود بڑی عظمت و عقیدت کے ساتھ قرآنی حروف پہ شہادت کی انگلی پھیرتی۔اس سے اس کے دل کو تسکین پہنچتی اور آنکھوں میں آنسو آجاتے۔اس کی خوشی کی کوئی حد اس وقت نہیں رہتی جب وہ اپنے قصبے کے مرکزی مقام چنار چھاوں میں ہندو؛مسلم؛ سکھ اور عیسائی برادری کے لوگوں کو ایک دوسرے کے ساتھ ہنسی مذاق کرتے اور پھل کھاتے دیکھتی؛ تب اسے یوں محسوس ہوتا کہ جیسے یہ سب اسکے بطن سے پیدا ہوئے ہوں۔اس کے اس احساس مسرت کا تعلق اسکی عملی زندگی سے بھی تو رہا تھا کیونکہ وہ اپنے قصبے کی مشہور ہنر مند دائی تھی۔اس لیے  وہ یہ جانتی تھی کہ اسکے سامنے یہ مشترکہ نئی نسل اس کے ہاتھوں شکم مادر سے اس جہان رنگ وبو میں آئی ہے۔ بہاراں؛ بے لوث خدمت کے سبب  اپنے قصبے میں مشترکہ تہذیب کا استعارہ بن کے رہ گئی تھی۔وہ تو اس وقت سے دائی کا کام کرتی آرہی تھی جب اسکے قصبے کے مکانات کچے ہوا کرتے تھے اور انٹر نیٹ کے غلط استعمال نے انسانی رشتوں کے تقدس کو پامال نہیں کیا تھا۔سینکڑوں بچوں کو اس نے ماں کی کوکھ سے زمین کی کوکھ پہ قدم رکھتے دیکھا تھا۔اللہ تعالے نے نہ جانے اس کے ہاتھوں میں کیا جادو رکھا تھا کہ جس بھی حاملہ عورت کے درد زہ کو دیکھ کے ڈاکٹر لوگ گھبرا کے بڑے شہر میں لے جانے کو کہتے اسے  بہاراں اپنی تحویل میں لیتی اور ایک دو بار ہاتھ پھیرتے ہی بچی  یا بچہ  تولد ہوتا۔ایک بار جب  رات کو دھنو دھوبی کی بیوی آرتی کے شریر میں درد زہ کی ترنگ اٹھی تھی تو وہ حواس باختہ سا دوڑتا بھاگتا  بہاراں کے گھر پہ آیا تھا اور زور سے پکار اٹھا تھا
    “دائی—-میری دھرم پتنی کو بچہ درد تڑپائے جات ہے؛چل کے دیکھونا”

     بہاراں؛ اپنے کچے مکان میں میٹھی نیند سوئی ہوئی تھی۔دھنو دھوبی کی پکار سے وہ جاگ گئی تھی۔اس کے ماتھے پہ شکنیں سی ابھر آئی تھیں اور تب اس نے دھنو دھوبی کو سمجھاتے ہوئے کہا تھا
     ” ابے ایسے نہیں بولتے؛مجھے تمہارا بولنا اچھا
  نہیں لگا۔جب ایسی بات ہو تو مجھے اس طرح
  آواز دیا کرو
“اماں——درد”میں سمجھ جایا کروں گی کہ میرے قصبے کی کوئی بہو؛ بیٹی درد زہ کے باعث زندگی اور موت کی کشمش میں ہے”
دھنو نے کہا تھا
“ہاں میں ایسے ہی پکاروں گا اور دوسروں کو بھی
یہ بات بتاوں گا۔مگر اماں آپ چلیں تو سہی”
     بوڑھی بہاراں ایک چھوٹا سا تھیلا بغل میں دبائے دھنو کے ساتھ چل پڑی تھی۔آگے دھنو کے گھر
میں اسکی بیوی آرتی درد زہ سے پچھاڑیں کھارہی تھی۔اسکی دلدوذ چیخیں سن کے دھنو کا دل دہل جاتا۔ بہاراں نے جاتے ہی اپنے ہاتھوں میں پتا نہیں کون سا تیل لگایا تھا اور پھر آہستہ آہستہ آرتی کے شریر پہ ہاتھ پھیرا تھا۔چند ہی لمحوں  بعد آرتی کی کوکھ سے ایک سندر سلونا سا بچہ اس جہان فانی میں آگیا تھا۔نومولود کی پہلی چیخ سن کر دھنو دھوبی کے جسم میں جان آگئی تھی۔اس کی زبان سے بے ساختہ نکل گیا تھا
  “اماں—بھگوان آپ کو سدا سکھی رکھے۔آپ جگ
جگ جیں”
وہ ذچہ اور بچہ کو دیکھ کر بہت خوش ہوا تھا۔پھر اس نے اپنی جیب میں ہاتھ ڈالا تھا اور پانچ سو روپے کا نوٹ بہاراں کو دیتے ہوئے کہنے لگا تھا
“اماں؛ یہ لیجیے میرا دل آج خوش ہوا ہے” بہاراں نے لینے سے انکار کیا تھا۔لیکن دھنو نے زبردستی پانچ سو روپے کا نوٹ پکڑا دیا تھا۔پھر وہ دھنو کے گھر سے رخصت ہوگئی تھی اور ٹارچ کی روشنی میں اکیلی اپنے کچے مکان میں پہنچ گئی تھی۔
     لالہ نند لال؛ بہاراں کے قصبے کا  سب سے بڑا
سیٹھ تھا۔دیوالی؛ہولی اور نوراتروں میں ان کے گھر میں دیسی گھی کے چراغ جلا کرتے تھے۔ایک رات جب ان کی بہو شادی کے سات سال بعد پہلی مرتبہ درد زہ سے کراہ اٹھی تھی تو لالہ نند لال اسپتال جانے کے بجائے خود بہاراں کے کچے مکان میں آئے تھے۔انھوں نے آواز دی تھی
  “اماں—-درد” بہاراں نماز تہجد پڑھ چکی تھی اور دعامانگنے میں مشغول تھی۔سیٹھ نند لال نے دوبارہ آواز دی تھی
“اماں—— درد”
بوڑھی بہاراں اندر سے بولی تھی
“ٹھہر جایئے آرہی ہوں”
چند لمحوں بعد وہ لالہ نندلال کے حویلی نما مکان میں پہنچ گئی تھی۔جاتے ہی اس نے اپنے ہاتھوں میں تیل لگایا تھا۔اللہ کانام لے کر آہستہ آہستہ لالہ نندلال کی بہو کے مخملیں شریر پہ دونوں ہاتھ پھیرے تھے ۔دیکھتے دیکھتے اسکے دردزہ میں افاقہ
ہوا تھا اور بہو نے ایک خوبصورت سی بالکہ کو جنم دیا تھا۔لالہ نند لال خوش ہوئے تھے لیکن ان کا بیٹا نیرج کسی حد مایوس ہوا تھا۔لالہ نند لال نے بہاراں
کی گود گری چھواروں سے بھر دی تھی۔  ایک ہزار روپے کا نوٹ؛تانبے کی تھالی اور پیتل کی بالٹی دی تھی اور ان کی بیوی نے اپنے کان میں لگی سونے کی ایک بالی اتار کے دی تھی۔
     اپنے کچے مکان میں پہنچتے ہی بہاراں کے پوتے پوتیوں نے اسکے ہاتھ میں گری چھواروں سے بھری پوٹلی دیکھ کر اسے گھیر لیا تھا۔دادی دادی کی رٹ لگائے وہ اس سے پوٹلی لینا چاہتے تھے۔مگر اس نے کسی کو بھی پوٹلی نہیں دی تھی ۔اس نے سب کو نیچے بٹھایا تھا اور اپنے ہاتھ سے ان میں برابر گری چھوارے بانٹ دیے تھے۔اسکے دونوں بیٹوں کے پکے مکان  تھے۔دونوں سرکاری ملازم تھے۔دونوں ماں کا بہت خیال رکھتے تھے ۔بہاراں نے ساس بہو کے رشتے کو ماں بیٹی کے رشتے میں بدل دیا تھا۔وہ اکثر کہا
   کرتی تھی
“ہر ساس اگر بہو کو اپنی بیٹی کی طرح سمجھے
  تو کوئی بھی گھر برباد نہیں ہوگا”
       بہاراں کو اپنے چھوٹے سے کچے مکان میں بہت سکون ملتا تھا۔کھانا تو وہ خود نہیں پکاتی تھی البتہ صبح لپٹن جائے کا ایک کپ  خود بناکر پی لیتی تھی۔اسے رسی کی کھاٹ پہ سونا بہت اچھا لگتا تھا۔ دونوں بیٹوں نے جب اسے ایک خوبصورت بیڈ اور بستر خرید کر دیا تھا تو وہ ان سے ناراض ہوئی تھی اور کہنے لگی تھی
     “میں رات کو تہجد پڑھتی ہوں ۔تمہارے اس نرم
   گرم بستر پہ جب لیٹوں گی تو میں کہاں جاگ
  پاوں گی۔قبر میں یہ نرم گرم بستر تو نہیں ہوگا”
       بہاراں کے قصبے میں مثالی قسم کی رواداری اور بھائی چارہ موجود تھا۔ہندو ؛ مسلم؛سکھ اور عیسائی آپس میں ایک خاندان کی طرح رہتے تھے۔دیوالی اور عید کی خوشیاں آپس میں بڑی دھوم دھام سے مناتے تھے؛ لیکن اس خوش کن   ہندو مسلم بھائی چارے کو اس وقت نظر بد لگ گئی تھی جب قصبے میں نہ جانے کہاں سے دو لنگور آکے بندروں پہ جھپٹ پڑے تھے اور انھیں نوچنا کھسوٹنا شروع کردیا تھا۔لنگوروں اور بندروں کے درمیان مہا بھارت دیکھنے کے لیے مرد عورتیں اور بچے اپنے گھروں سے باہر نکل آئے تھے۔ چند ہندو لڑکوں نے بندروں کو اس لیے بچانے کی کوشش کی تھی کہ بندر ہمارے اس قصبے میں 80 سال سے رہ رہے ہیں جب کہ لنگور پہلی بار اس قصبے میں کہیں سے آنکلے ہیں۔ مسلمان لڑکے یہ چاہتے تھے کہ لنگور ؛بندروں کو پٹک پٹک کے ماریں کیونکہ ان بندروں نے
پورے  قصبے کے لوگوں کاناک میں دم کردیا تھا۔بندر گھروں میں گھستے تھے اور اندر سے کپڑے؛کھانے پینے کی چیزیں لے جاتے تھے  اور بعض اوقات بوڑھوں اور بچوں پہ جھپٹ پڑتے تھے۔ہندو اور مسلمان لڑکے دو متضاد نظریے کے تحت چل رہے  تھےکہ ان میں آپس میں توتو میں میں اور دھکا مکی کی نوبت آگئی تھی۔بندر اور لنگور دونوں قسم کے جانور تو وقتی طور پر قصبے کی فصیل پھاند کر کہیں دور چلے گئے تھے۔لیکن قصبے میں فرقہ پرستی کا زہر چھوڑ گئے تھے۔”بولو شری ہنومان جی کی جے” اور “اسلام زندہ باد”کے نعرے فضا میں گونجنے لگے تھے کہ اتنے میں پولیس آگئی تھی اور
اس نے ان مشتعل نوجوانوں کو حراست میں لے لیا تھا۔دوسرے ہی دن قصبے کے کچھ سنجیدہ ہندو؛مسلم؛سکھ اور عیسائی لوگوں نے گذشتہ روز ہندو مسلم نوجوانوں کی نازیبا و ناشائستہ حرکت کے بارے میں ایک میٹنگ بلائی تھی۔دونوں فرقوں کے لڑکے اس میٹنگ میں شامل ہوئے تھے۔ بہاراں بھی اس میٹنگ میں بن بلائے چلی آئی تھی۔اس کے آتے ہی سب لوگ کھڑے ہوکر بیٹھ گئے تھے۔سب نے نوجوان لڑکوں کی سرزنش کی تھی؛انھیں اپنی غلطی کا احساس دلایا تھا۔آخر پر بہاراں نے بڑے رقت آمیز لہجے میں کہا تھا
  “تم سب کو اپنے خاندان کے لوگ سمجھتی ہوں۔
  میرے ہاتھوں تمہارا جنم ہوا ہے۔میری آنکھوں نے
   تمہارا بچپن؛ لڑکپن اور جوانی کا زمانہ دیکھا ہے
   اور اس عمر میں اب تمہارا بڑھاپا دیکھ رہی ہوں۔
  میں خود اب ڈوبتے سورج کی کرن کی مانند ہوں۔
   دنیا کی سب سے انمول نعمت دل کا سکون ہے۔
اتفاق واتحاد کی نعمت کو نہ کھونا۔میرے قصبے
  میں رہنے والے مسلمان اور ہندو میری آنکھیں ہیں؛
    سکھ اور عیسائی میرے بازو۔کل جن بچوں نے
غلط حرکت کی ہے وہ آپس میں ایک دوسرے سے
   معافی مانگیں اور ایک دوسرے کے ساتھ گلے ملیں
    ورنہ مجھ بوڑھی کا دل روتا رہے گا”
          آخری جملہ کہتے ہوئے بہاراں کی آنکھوں میں آنسو آگئے تھے۔میٹینگ ایک خوشگوار ماحول میں اختتام پزیر ہوئی تھی۔آخر پر حلوہ بانٹا گیا تھا۔
   ایک ہفتے کے بعد  بہاراں نے اپنی دونوں بہووں کو اپنے پاس بلایا تھا۔اپنی چھوٹی سی المونیم کی صندوقچی کھولی تھی؛ اس میں سے بیس ہزار روپے نکال کر دونوں کو دس دس ہزار  دے دیے تھے ۔دوسرے دن اپنی بیٹیوں کو بلایا تھا اور ان کو بھی دس دس ہزار روپے دے دیے تھے۔ایسا کرنے سے اسے سکون سا ملا تھا۔تیسرے دن ہلکی سی بارش ہوئی تھی۔ نماز عصر کا وقت تھا۔وہ وضو بنانے کے
لیے جونہی اندر سے باہر نکلی تھی تو اسکے دونوں پیر پھسل گئے تھے اور وہ چاروں شانے چت نیچے گر گئی تھی۔اسکی چیخ سن کر گھر کے تمام افراد اسکی طرف دوڑ پڑے تھے۔پوتے پوتیاں چیختے ہوئے دادی دادی پکارنے لگے تھے اور دونوں بہو؛ بیٹے ماں کو بے ہوشی کی حالت میں دیکھ کر روتے ہوئے اماں  اماں پکارنے لگے تھے۔انھوں نے فورا”ماں کو اٹھایا تھا اور گاڑی میں رکھ کر اسپتال لے گئے تھے۔
اسپتال پہنچتے ہی اس نے اپنی دونوں آنکھیں کھول دی تھیں اور پھر کلمہ پڑھتے ہوئے دم توڑ دیا تھا۔اس کے باغ کے تمام پھول بیک وقت اسکے صدمے سے مرجھا گئے تھے۔اک کہرام سامچ گیا تھا۔یہ مایوس کن خبر پورے قصبے میں چند لمحوں میں پھیل گئی تھی۔جس نے جہاں سنا تھا وہ وہیں سے اسپتال کی جانب دوڑ پڑا تھا۔جب لاش گھر پہنچائی گئی تھی تو سب نے متفقہ طور پر یہ فیصلہ کیا تھا کہ میت کی تحجیز وتکفین کل ہوگی۔ ساری رات گھر کے تمام افراد نے  روتے بلکتے گزار دی تھی۔دوسرے دن قصبے کے تمام دکان داروں نے دکانیں بند رکھی تھیں۔پورے قصبے میں سناٹا چھایا
ہوا تھا۔میت کو غسل اور کفنانے کے بعد جب تابوت
میں رکھا گیا تھا تو آخری دیدار کے لیے گھر کے تمام افراد کو بلایا گیا تھا۔بہاراں دائی کا چہرہ بہت زیادہ
نورانی نظر آرہا تھا۔یوں معلوم ہورہاتھا کہ جیسے وہ
مسکرارہی ہوں۔جونہی تابوت اٹھانے لگے تھے تو ہندو اورسکھ برادری کے لوگ آگے آئے تھے۔انھوں نے میت کو پہلے کندھا دیا تھا۔لالہ نندلال نے روتے ہوئے  ایک سفید قیمتی چادر تابوت کے اوپر ڈال دی تھی۔دھنو دھوبی دھاڑیں مارمار کر رورہا تھا۔سکھ رشپال سنگھ نے روتے ہوئے ایک آدمی سے کہا تھا
  “بہاراں مائی؛ کی موت ہم سب کی موت ہے۔کیونکہ
  اب ہمارے قصبے کی کوئی بھی عورت بغیر آپریشن
   کے بچہ نہیں جنے گی”
                                 **
یہ افسانہ معروف واہٹس ایپ گروپ ’’ بزمِ افسانہ‘‘ کے توسط سے پیش کیا جارہا ہے۔
——————————————
sab ki maa , Mother of all, best story

وہ اسٹوری ٹیلر کے نام سے اس قدر مشہور ہو چکی تھی کہ لوگ اس کا اصل نام تک نہیں جانتے تھے۔کبھی کبھی اس کے فن اور شخصیت پر کوئی مضمون شائع ہوتا تو اس کا اصل نام سامنے آجاتا تھا ورنہ وہ زمانے کے لئے اسٹوری ٹیلر ہی تھی۔ دنیا کے بہت سے ملکوں کے بڑے بڑے شہروں میں اس نے اپنے شو کئے تھے۔وہ کئی زبانوں پر عبور رکھتی تھی،اس نے کہانی سنانے کے فن کو بلندیاں عطا کی تھیں۔وہ شاندار قصّہ گو تھی۔اس کی تخلیق کردہ کہانیاں بے حد دلچسپ اور نرالی ہوتی تھیں۔ اس نے اپنی کہانیاں سنانے کے لئے داستانوی انداز اختیار کیا تھا۔اسٹوری ٹیلر کے خیال میں لوگ وہاٹس اپ،فیس بک اور سوشل میڈیا کی دیگر مصروفیات سے اکتا چکے تھے۔اس نے کتابیں لکھنے اور فلم یا ٹی وی کے لئے اسکرپٹ لکھنے کے بجائے اسٹوری ٹیلنگ کا طریقہ اختیا ر کیا۔
وہ ایک پروگرام کی بڑی رقم وصول کیا کرتی تھی۔اس کے شو بڑی بڑی کمپنیاں منعقد کراتی تھیں۔ جس کے ٹکٹ مہنگے دام میں فروخت ہوتے تھے۔پروگرام کے منتظمین کو با مشکل تمام اس کی تاریخ ملا کرتی تھی۔اس کی شہرت امیر اور اعلی طبقے میں زیادہ تھی۔وہ معاشرے کی ہائی سوسائٹی کے لئے تفریح اور لطف اندوز ہونے کا نیا انداز بن کر ابھری تھی۔ اس کے مداحوں میں بڑے آفیسر،ڈاکٹر، بزنس مین، فنکار،اسپورٹس مین اورفلم اسٹار بھی شامل تھے۔ اس کے شو دیکھنے والوں کو سماج میں عزّت کی نگاہ سے دیکھا جاتا تھا۔
آج کی اس کی یہ اسٹوری ٹیلنگ ایک بڑے ملک کی راجدھانی کے ایک عظیم الشان آڈیٹوریم میں منعقد کی جا رہی تھی۔وہ اس ملک میں اپنی داستان پہلی بار سنا رہی تھی۔لوگ بے قراری سے اسٹوری ٹیلر کے اسٹیج پر جلوہ افروز ہونے کے منتظر تھے کہ پروگرام کا آرگنائزر اسٹیج پر آیا اور سامعین سے مخاطب ہوا:
”دوستوں! آپ کا انتظار اب ختم ہونے جا رہا ہے۔ہمارے ملک کے لئے، ہم سب کے لئے یہ فخر کا مقام ہے کہ اسٹوری ٹیلر نے ہماری درخواست پر ہمارے ملک میں شو کرنے کی منظوری دی۔اب آپ کچھ ہی دیر میں اسٹوری ٹیلر آپ سے روبرو ہونگی۔ہم اپنے ملک کی طرف سے، اپنی کمپنی کی طرف سے اور آپ سب کی طررف سے اسٹوری ٹیلر کا تہہ دل سے خیر مقدم کرتے ہیں۔ تو صاحبوں استقبال کریں اسٹوری ٹیلر کا۔“
ارگنائزر شکریہ ادا کر کے چلا گیا تو اسٹوری ٹیلر اپنے مخصوص انداز میں اسٹیج پر جلوہ افروز ہوئی، وہ بے حد حسین اور دلفریب لگ رہی تھی۔اس کا چست لباس اس کی دلکشی کو ابھار رہا تھا۔ اس نے ایک ادائے دلربائی سے سامعین کی طرف فلائنگ کس اچھالی۔ مگر اسے بے حد حیرانی ہوئی کہ ناظرین محض اسے دیکھے جا رہے تھے۔ اسے اپنی کس کا کوئی بھی ردِعمل ان کی طرف سے نہیں ملا۔ ایسے موقعوں پر اکثر ناظرین سیٹیاں بجانا شروع کر دیتے تھے اور تالیوں کی گڑگڑاہٹ سے ہال کی دیواریں دہل جاتی تھیں۔
”دوستوں!“ اسٹوری ٹیلر نے کان میں لگے مائک کو اپنے ہونٹوں کے آگے درست کرتے ہوئے کہا۔۔۔۔
” امید ہے کہ میری آج کی یہ کہانی، یہ تخلیق آپ کو ضرور پسند آئے گی۔آپ اس سے یقینا لطف اندوز ہوں گے۔
میری آج کی کہانی کا نام ہے ٹی او ڈی۔“
اس نے چند لمحے سامعین پر نگاہ دوڑائی تاکہ کہانی کے عنوان کا تاثر جان سکے، سارا مجمع دم بخود تھا۔ سب کی سانسیں تھم سی گئی تھیں۔ایک سکوت کا عالم تھا۔ اسٹوری ٹیلر کو عجیب سا محسوس ہوا۔
اس نے کہانی سنانی شروع کی۔
”ایک بہت عظیم الشان ملک تھا۔ جس کا نام گلستان تھا۔ اس کی شاندار تاریخ، اس کی تہذیب و تمدّن،ثقافت، اس کی شان و شوکت اور عظمت کا چرچہ دنیا بھر میں تھا۔مگر چند دہائیوں سے جن حکمرانوں نے ملک کی ذمہ داری سنبھالی تھی وہ اس کی عظمت کو برقرار نہ رکھ سکے تھے۔“
یہ کہہ کر اسٹوری ٹیلر نے چند لمحوں کے لئے خاموشی اختیار کی اور ہال میں موجود لوگوں کی جانب نگاہ دوڑائی۔ خاموشی
مکمّل خاموشی چھائی ہوئی تھی۔۔۔۔۔اس نے آگے کہا۔۔۔۔۔”پھر اس ملک کی باگ ڈور ایک ایسے شخص نے اپنے ہاتھوں میں لے لی جو مکّار، چالاک اور موقع پرست تھا۔اس نے اپنے آس پاس خوشامد کرنے والوں فوج تیّار کر رکھی تھی،جو اس کے اشارے پر کام کرتے تھے۔ دلچسپ بات یہ تھی کہ ملک کے کچھ دانشوروں کی خیال میں وہ بہت بڑا احمق تھا۔ اسی مناسبت سے وہ عوام کے ایک بڑے طبقے میں احمق ہی مشہور ہو گیا تھا۔۔۔۔۔۔۔احمق کی ’حماقت ‘ کے چرچے ملک سے نکل کر غیر ممالک میں بھی ہونے لگے تھے۔۔۔۔۔۔۔۔ملک جادونگری کو اس کی حماقتوں کا علم ہوا تو اس کے حاکم جادوگر نے فوراََ حکمتِ عملی تیار کی اور اس پر عمل پیرا ہونے کے لئے احمق کے ملک کے سفر کا ارادہ کیا اور احمق کو بھی جادونگری میں آنے کی دعوت دی۔“
اسٹوری ٹیلر کچھ دیر رکی اور لمبا سانس کھینچ کر پھیپھڑوں کو تازگی بخشنے کے بعد گویا ہوئی۔۔۔۔۔۔” معزز حاضرین! یہ بات واضع رہے کہ جادونگری نے اپنی جادوگری سے کئی ملکوں پر غیر اعلانیہ قبضہ کر لیاتھا۔ جادوگر تمام دنیا پر اپنا جادو چلانا چاہتا تھا۔۔۔۔۔۔اب اس کی نظریں گلستان پر تھیں۔اس کے لئے یہ سنہری موقع تھا۔جادوگر گلستان پر اور بالخصوص احمق کی کارگزاریوں پر گدھ کی نگاہ رکھے ہوئے تھا۔ملک گلستان کی بائیں بازو کی خفیہ رپورٹ تو یہ بھی بتاتی تھی کہ احمق کا گلستان کا حاکم بننے میں جادوگر کا ہاتھ تھا۔ احمق نے اب جادو نگری کی چوکھٹ پر حاضری دینا شروع کر دی تھی۔
اس بار جب احمق جادونگری کے سفر پر گیا تو جادوگر اسے اپنے طلسماتی محل کے خفیہ کمرے میں لے گیا اور بولا۔۔۔۔۔ ”دیکھئے حاکمِ گلستاں! ہم چاہتے ہیں کہ گلستان ترقی کرے، مگر۔۔۔۔۔۔۔۔“ جادوگر خاموش ہو گیا۔
”مگر کیا حضور۔۔۔“ احمق نے اپنی نہ نظر آنے والی دم ہلاکر وفاداری کا ثبوت دیا۔۔۔۔”آپ تو بس حکم کریں۔۔“
”دراصل بات یہ ہے کہ گلستان کی عوام بیدار مغز نہیں ہے اور سب سے بڑی بات یہ کہ خوابوں کی دنیا میں رہتی ہے،اپنی خیالی دنیا سے باہر ہی نہیں آتی۔“ جادوگر نے اپنے چہرے پر زبردستی فکر کے تاثرات لاتے ہوئے کہا۔
”میں جانتا ہوں حضور، مجھے اپنے ملک کی عوام کی نادانیوں کا اعتراف ہے۔“احمق نے مایوسی کا اظہار کیا۔”حضور، آپ کچھ مدد کریں، میری رہنمائی فرمائیں۔“
ہاں ہاں کیوں نہیں۔“ جادوگر کسی ایسے ہی موقع کی تلاش میں تھا۔اس کے چہرے پر شاطرانہ مسکراہٹ تھی۔۔”اگر آپ چاہتے ہیں تو میں مدد کو تیار ہوں۔ اس کے لیے آپ کو اپنی عوام سے ایک ٹیکس وصول کرنا ہوگا۔ اس ٹیکس کی وصولی کے لیے جس طرح کی بھی مدد کی ضرورت ہوگی جادونگری کرے گی۔“
ایک اور نئے ٹیکس کے نام پر احمق خوش ہو گیا، اسے جنتا پر نئے نئے ٹیکس لگانے کا خبط تھا۔
”حضور! اب یہ بھی بتا دیجئے، یہ ٹیکس کس طرح کا ہوگا اور مجھے کیا کرنا ہے؟“ احمق نے پوچھا۔
”دیکھئے، ہم چاہتے ہیں کہ۔۔۔۔“ جادوگر نے نہایت سنجیدگی کا مظاہرہ کرتے ہوئے کہا۔۔۔”دنیا کا ہر ملک ترقّی کرے۔ پسماندہ ملک ہو یا پھر ترقی پذیر۔ترقی کرنا، آگے بڑھنا، ہر انسان،طبقے، قوم اور ملک کا حق ہے۔ ہم نے ’عالمی جادوئی تنظیم‘میں بھی اس بات کا اظہار کیا تھا کہ عوام کو ایک دوسرے سے نفرت اور خود غرضی سے دور رکھا جائے اور عالمی سطح پر بھی امن اور بھائی چارہ پھیلے۔ ہم چاہتے ہیں کہ آپ کا ملک خوب آگے بڑھے، کیوں کہ آپ ہمارے دوست ہیں۔“جادوگر نے ٹیبل سے مشروب اٹھا کر احمق کی طرف بڑھایا۔ جادوگر کے اس رویّہ میں مہمان نوازی کا عنصر کم اور شکار کو پھانسنے کا معاملہ زیادہ محسوس ہو رہا تھا۔ جادوگر نے آگے کہا۔۔۔۔۔
”دیکھیے حاکم ِ گلستاں!جادونگری کے ایک سائنسداں نے ایک ایسی ایجاد کی ہے، جس سے کسی بھی انسان کے خوابوں کو ریکارڈ کیا جا سکتا ہے۔ایک بہت چھوٹی سی چپ کو جس انسان کے بازو میں معمولی سے آپریشن کے ذریعے فٹ کر دیا جائے گا، وہ جب بھی کوئی خواب دیکھے گا، ایک مخصوص کمپیوئٹر میں ریکارڈ ہو جائے گا، وہ خواب جاگتی آنکھوں کا ہو پھر نیند میں آنے والا خواب ہو۔“
”تو پھر۔۔۔۔؟“ احمق نے اپنی حماقت دکھائی۔
”پھر کیا۔۔۔سمجھو۔۔۔۔“ جادوگر نے جھنجھلا کر کہا۔ ” پھر یہ کہ آپ کو اپنے ملک کے ہر باشندے کے بازو میں یہ چپ فٹ کرانی ہوگی اور تب جو بھی کوئی دیکھے گا، اس سے ٹیکس وصول کرنا ہوگا۔ اس سے دو فائدے ہوں گے، اوّل یہ کہ ٹیکس کی رقم سے فلاحی کام کرائیے گا اور دوسرے آپ کی عوام خوابوں سے نکل کر عملی دنیا میں میں آجائے گی۔ آپ کا ملک تیز رفتاری سے ترقّی کرے گا۔“
یہ سن کر احمق کو کچھ تشویش ہوئی، اس نے اپنی ساری ہمّت و حوصلہ سمیٹ کر کہا۔۔۔۔۔ ”حضور جان کی امان پاؤں تو عرض کروں؟۔۔۔۔۔۔اس چپ کا استعمال آُ پ اپنے ملک کی عوام پربھی کر رہے ہیں؟“
جادوگر نے احمق کو ایسے دیکھا جیسے یہ سمجھنے کوشش کر رہا ہوکہ اتنی سمجھداری کی بات اس کے دماغ میں آئی کیسے۔ وہ سمجھ نہیں پا رہا تھا کہ کیا جواب دوں۔۔۔۔”جادونگری کی عوام خواب نہیں دیکھتی عمل کرتی ہے۔“ یہ جملہ تیزی سے کہہ کر جادوگر نے میٹنگ کے خاتمے کا اشارہ کر دیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
احمق نیا سبق سیکھ کر اپنے ملک گلستان واپس آیا۔اس نے فوراََ ایمرجنسی میٹنگ بلائی۔ جس میں اس نے تمام وزیروں اور عہدِ داروں کو اس چپ کی اطلاع دی۔ پھر اس نے باضابطہ اعلان کیا۔۔۔۔”ایک نیا محکمہ خواب و خیال قائم کیا جائے۔ اس محکمے کی تمام ذمہ داریاں میں خود سنبھالوں گا۔اس کی ضروری کاروائیاں جلد سے جلد شروع کی جائیں، اس کام میں کسی بھی طرح کی کوتاہی برداشت نہیں کی جائے گی۔“
کہانی سناتے سناتے اسٹوری ٹیلر اچانک خاموش ہو گئی، وہ مجمع پر نگاہیں دوڑانے لگی۔ ہر طرف خاموشی تھی، پوری طرح سنّاٹا۔ اس کا اندازہ غلط ثابت ہوا، وہ سوچ رہی تھی کہ لوگ اس پر سوال کریں گے، بھلا ایسے کیسے ہو سکتا ہے۔ مگر خاموشی بتا رہی تھی کہ انھوں نے اس بات کو قبول کر لیا ہے۔
اسٹوری ٹیلر نے اپنے مخصوص انداز میں دونوں ہاتھوں کو اوپر لے جا کر نیچے جھٹکا اور آگے کہا۔۔۔”اورجب یہ خبر عوام تک پہنچی تو پورے ملک میں ہنگامہ ہو گیا۔ اس نئے قانون کی زبردست مخالفت کی گئی۔لوگ یہ ٹیکس دینے پر کسی صورت راضی نہ تھے۔ ان کا کہنا تھا ہم یہ آپریشن کرائیں گے ہی نہیں۔
مرکزی سطح پر جو محکمہ خواب خیال قائم کیا گیا تھا، اس کی صوبائی شاخیں بنائی جانے لگیں۔ ساتھ ہی ہر ضلع میں اس کے مراکز قائم کئے گئے۔ہر ضلع کے سرکاری اسپتالوں میں اس کا مخصوص شعبہ تیار کیا جانے لگا۔ حکومت نے اس کام کو تحریک کی شکل دے دی تھی۔دیگر محکموں سے بھی مدد لی جا رہی تھی۔ عوام الناس سے سیدھا تعلق بنانے کے لئے سرکاری کارندے جو نئیر ڈاکٹر کے ہمراہ گھر گھر جا کر آپریشن کرکے گیہوں کے دانے کے برابر چپ ہر شخص کے بازو میں لگا رہے تھے اور اس کا رابطہ ضلع کے محکمہ خواب وخیال کے دفاتر میں رکھے کمپیوٹر سے جوڑا جا رہا تھا تاکہ دیکھے گئے خوابوں کو ریکارڈ کیا جا سکے اور اس کا بل بناکر رقم وصول کی جائے۔
ظاہر ہے یہ کوئی معمولی اور چھوٹا کام نہ تھا۔اس کے لئے وقت درکار تھا۔اس کام میں خرچ ہونے والی رقم کے لئے جادونگری فنڈنگ کر رہی تھی اور ساتھ ہی اس نے اس کام کے لئے سائنس داں، ڈاکٹر اور دیگر ’ماہرین‘ کا بھی انتظام کیا تھا۔
دوسری طرف حکومت میں بائیں بازو کی طاقت اس ٹیکس کے سخت خلاف تھی۔مگر ان کی ایک نہ چلی۔حکومت کا کام جاری رہا۔عوام میں زبردست ہلچل تھی، اس کے خلاف جلسے، جلوس اور دھرنا پردرشن ہو رہا تھا۔ملک کا ذہین دانشور طبقہ بھی سڑکوں پر اتر آیا تھا۔ہر شہر کے پبلک پارکوں میں آوازیں بلند ہو رہی تھیں۔
دفتروں اور چائے خانوں میں بھی اسی کا ذکرہو رہا تھا۔ ایک دفتر میں بڑے بابونے کہا۔۔۔۔ ”میرے خیال میں اس ٹیکس سے ملک کو بہت فائدہ ہوگا۔“
”جناب! آپ کس بنیاد پر ایسا کہہ رہے ہیں؟“ دوسرے بابو نے مخالفت کی۔
”دیکھو بھائی، میں تو اتنا جانتا ہوں کہ ہمارے ملک کا حکمراں اور اس کی ٹیم بہت قابل لوگ ہیں۔ انھوں نے یہ فیصلہ کیا ہے تو کچھ سوچ کرہی کیا ہوگا۔“ پاس میں بیٹھے کلرک نے چائے کی چسکی لیتے ہوئے کہا۔
”وہی تو میں کہہ رہا ہوں۔“ بڑے بابو نے ٹیبل پر ہاتھ مارا۔۔۔۔”ہم سب کو خوابوں کی دنیا سے باہر نکلنا ہی ہوگا۔“
”یہ مت بھولو، دنیا میں جس کسی طرح کی بھی ایجادات ہوئی ہیں یا انسان نے کامیابی حاصل کی ہے اس کے پیچھے انسانوں کے خواب ہی تھے۔“ کلرک نے فائل کو ایک طرف کرتے ہوئے جھنجھلاہٹ سے کہا۔
”مگر میرے بھائی ایسے لوگ دنیا میں چند ہوتے ہیں، جن کے خواب انسانی نسل کے لئے مفید ہوں۔“ دوسرے بابو نے کہا۔
”ہمارے ملک کی عوام جس خوابوں کی دنیا کی دنیا میں رہتی ہے، وہ بے حد خطرناک ہے۔“بڑے بابو بولے۔
”آپ درست فرما رہے ہیں۔خوابوں پر ٹیکس لگنا ہی چاہئے۔“ کلرک نے چاپلوسی والے انداز میں کہا۔
”خوابوں پر ٹیکس۔۔۔اونہہ۔۔۔“ دوسرے بابو نے جھنجھلا کر اخبار کو ٹیبل پر پٹخ دیا اور دفتر سے باہر چلا گیا۔
ملک کی یونیورسٹیوں میں بھی اس کے خلاف چرچے ہو رہے تھے۔ ملک کی ایک مرکزی یونیور سٹی میں برابر احتجاج ہو رہا تھا۔ہزاروں کی تعداد میں طالب علم آزادی کا پرچم اٹھائے نعرے لگاتے گھوم رہے تھے۔۔۔۔۔
”ہم کیا چاہیں، آزادی!“
”سپنے دیکھنے کی آزادی“
”جینے کی آزادی“
”آزادی۔۔۔۔ آزادی۔۔۔آزادی۔۔“
مگر ان سارے ہنگاموں کا حکومت پر کوئی اثر نہیں ہوا۔“
اسٹوری ٹیلرنے دائیں جانب دیکھا جہاں کونے میں ٹیبل پر پانی کی چھوٹی چھوٹی بوتلیں رکھی ہوئیں تھیں۔ وہ آہستہ آہستہ چلتی ہوئی ٹیبل کے قریب گئی۔اس نے پانی کی بوتل اٹھائی ایک ہی سانس میں بوتل خالی کر دی۔اس کے حلق سے پانی اندر جانے کی ’غڑپ غڑپ‘ کی آوازیں کان میں لگے مائک کی وجہ سے سب کو سنائی دے رہی تھیں۔
اسٹوری ٹیلر بہت پریشان تھی آخر کیوں آج کوئی ہاتھ اٹھا کر سوال نہیں کر رہا۔ایسے کیسے ہو سکتا ہے کہ اس کہانی پر کسی کوکوئی اعتراض نہیں ہوا؟ دوسرے ملکوں میں تو اس کہانی پر کئی اعتراض ہوئے تھے۔۔۔۔ وہ آگے بولی۔۔۔”۔۔۔اور دوستوں آخر کار وہی ہوا جو احمق چاہتا تھا۔۔۔غریب اور لاچار عوام پر ایک اور ٹیکس لاد دیا گیا۔۔۔۔خواب دیکھنے کا ٹیکس۔جی ہاں ٹی او ڈی۔ یہ ٹیکس دو قسم کا تھا، ایک جاگتی آنکھوں والے خوابوں کا ٹیکس اور دوسرا نیند میں آنے والے خوابوں کا ٹیکس۔ دوسرے قسم کے ٹیکس کی رقم، پہلے والے ٹیکس سے کم تھی۔
سرکاری خزانے میں لگاتار رقم جمع ہو رہی تھی۔لوگ خود کو خواب دیکھنے سے باز نہیں رکھ پا رہے تھے۔وہ بہت کوشش کرتے کہ خواب نہ دیکھیں مگر۔۔۔۔بے خیالی میں خوا بوں میں کھو جاتے اور گھر پر لگا خوابی میٹر چل پڑتا۔غریب لوگ جتنا کماتے تھے، اس کا زیادہ تر حصّہ ٹیکس میں چلا جاتا تھا۔کبھی کبھی آمدنی سے زیادہ ٹیکس ادا کرنا پڑ تا تھا۔امیر اور اعلی طبقے کے لوگوں کو شروع میں ٹیکس ادا کرنے میں کوئی دشواری نہیں ہوئی مگر بعد میں وہ بھی لگاتار پیسہ دیتے دیتے اکتا چکے تھے۔تب ان لوگوں نے فیصلہ کیا کہ وہ اب کبھی کسی بھی حالت میں خواب نہیں دیکھیں گے۔“
اسٹوری ٹیلر کا گلا خشک ہو چکا تھا۔وہ تھکان محسوس کر رہی تھی۔ اس نے ایک بار پھر پانی پیا۔ اور نئی توانائی کے ساتھ کہانی کو آگے بڑھایا۔
”۔۔۔۔ تو دوستوں آپ کو کیا لگتا ہے کہ آگے کیا ہوا ہوگا۔؟۔۔۔۔“
اسٹوری ٹیلر خاموش ہوگئی اور جواب کا انتظار کرتے ہوئے،آگے کی قظار میں بیٹھے لوگوں کا چہرہ تکنے لگی۔ کوئی کچھ نہیں بولا۔ اسٹوری ٹیلر کو اس بات کی بالکل توقع نہیں تھی۔ وہ مایوسی کے انداز میں کہانی کو اختتام کی طرف لے جانے لگی۔
”کئی لوگوں پر تو اس بات کا ہی ٹیکس لگا دیا گیا کہ وہ خواب دیکھنے کا خواب دیکھ رہے تھے۔۔۔۔ تو پھر دوستوں! چند سالوں میں ہی صورتِ حال کچھ اس طرح ہو گئی کہ امیر اور اعلی طبقے کے لوگ غیر ممالک میں جا بسے۔ متوسط طبقے کے لوگوں نے بڑی تعداد میں خود کشی کر لی۔بے شمار لوگ حکومت سے بغاوت کرنے، فسادات اور بھوک سے مارے گئے۔
ایک سروے کے مطابق کل ۳۳ فیصد آبادی باقی رہ گئی تھی جس نے بنا خوابوں کے جینا سیکھ لیا تھا۔یہ وہ لوگ تھے جو ایک مشین میں تبدیل ہو چکے تھے، ان میں انسانی احساسات و جذبات ختم ہو چکے تھے۔یہ لوگ سانس لیتے تھے، مشین کی طرح کام کرتے تھے، مشین میں ڈالے جانے والے تیل،پیٹرول کی طرح کھانا کھاتے تھے اور جس طرح مشینوں کی کبھی کبھی صفائی ہوتی ہے، اس انداز میں سیکس کرتے تھے۔کچھ دیر بستر پر آرام کے لئے ایسے جاتے تھے جیسے مشین چلتے چلتے گرم ہو جاتی ہے تو اس کو ٹھنڈا کرنے کے لئے معمولی وقت کے لئے بند کر دیا جاتا ہے۔ترقّی تنزلّی، عزّت، ذلّت، اچھّائی برائی ان کے لئے کوئی معنی نہیں رکھتی تھی۔ تمام طرح کی جمالیاتی حس سے وہ ناواقف ہوچکے تھے۔“
اسٹوری ٹیلر ایک بار پھر خاموش ہو گئی۔ اس نے مایوسی کا ایک لمبا سانس چھوڑا۔۔۔۔ اور بولی۔۔۔۔۔ ”احمق جو ایک بار پھر ملک کا حکمراں منتخب ہو گیا تھا۔، وہ جادونگری کی چوکھٹ پر بیٹھا اپنے ملک کی بربای کے لئے آنسو بہا رہا تھا۔۔۔۔
”میں سمجھ نہیں پا رہا ہوں سرکار، اب میں کیا کروں۔۔۔۔تمام طرح کی صلاحتیں گلستان سے ناپید ہو گئی ہیں، اب گلستان برباد ہو چکا ہے۔“
یہ سن کر جادوگر مسکرایا اور بولا۔۔۔۔”ارے تو اس میں گھبرانے کی کیا بات ہے؟ہم گلستان کی حفاظت کے لئے نہ کہ صرف یہ کہ اپنی فوجی طاقت کو آپ کے یہاں بھیجیں گے بلکہ ساتھ ہی ہر طرح کی صلاحتیں بھی بھیجیں گے اور یہی نہیں بلکہ ملک کو نئے سرے سے آباد کرنے کے لئے ہم جادونگری کی عوام بھی وہاں بھیجیں گے۔۔۔۔۔ اب تو خوش ہو نہ حاکمِ گلستاں۔۔۔۔۔ اور بولو۔۔۔۔“
یہ سن کر احمق خوش ہو گیا اور شکریہ ادا کرنے کے لئے جادوگر کے جوتے اپنی قمیض کی دامن سے صاف کرنے لگا۔“
اسٹوری ٹیلر نے ایک لمبی سانس چھوڑی اور تھک کر قریب رکھی کرسی پر بیٹھتے ہوئے بولی۔۔۔۔
”بس اتنی سی تھی یہ کہانی۔“
اسٹوری ٹیلر کہانی مکمّل کر چکی تھی۔مگر اسٹوری ٹیلر کے لئے مقامِ حیرت تھا کہ سامعین میں سے کسی نے تالیاں نہیں بجائی تھیں، کسی بھی طرح کے ردِعمل کا اظہار نہیں کیا تھا۔وہ سوچ رہی تھی کہ یہ کیسے لوگ ہیں ہر احساس سے عاری۔ سارے سامعین کہانی سن کر آڈیٹوریم سے اس طرح باہر نکل رہے تھے جیسے ان کے بازو میں بھی کوئی چپ نصب ہو۔
٭٭٭

سمرین جب آفس سے گھر پہنچی تو تھک کر چور ہوچکی تھی۔ آفس میں آج کام زیادہ ہی تھا۔ جس نے تھکان پیدا کردی تھی۔وہ گھر میں داخل ہوکر پرس ایک طرف پھینکا اور بستر پر گر پڑی۔ اس میں ذرّہ برابر قوت نہیں تھی کہ وہ فریش ہوکر اپنے لیے ایک کپ چائے بنائے۔ پلنگ پر لیٹتے ہی خوابوں کی دنیا میں پہنچ کر خوابوں کے سمندر میں غوطے کھانے لگی۔ اسے اس بات کا بھی خیال نہ رہا کہ ناصر کے آنے کا وقت ہوگیا ہے۔ ابھی رات کا کھانا بنانا بھی باقی ہے۔ دوپہر کا کھانا تو اکثر باہر ہی کھاتے تھے۔ ایک ساتھ نہیں بلکہ اپنے اپنے دفتر میں اور رات کا کھانا وہ ہمیشہ ساتھ ہی کھاتے ۔
دروازہ کی بیل لگاتار بج رہی تھی۔ سمرین نیند کی آغوش سے باہر آئی۔کچھ دیر تک تو وہ سمجھ ہی نہیں پائی کہ کہاں ہے۔ آفس میں ہے یا گھر میں۔ بڑی عجلت میں اس نے دروازہ کھولا۔ سامنے اس کی زندگی کا رکھوالا ، اس کا ہم سفر ناصر کھڑا تھا۔ اس نے روزانہ کی طرح ناصر کو دیکھ کر اپنے چہرے پر ایک بھر پور مسکراہت بکھیری۔ ناصر نے گھر میں آنے کے بعد سمرین کو سینے سے لگا لیا اور پیار کرنے لگا۔ اس نے ناصر کو ہٹاتے ہوئے کہا رات ابھی باقی ہے۔ اوراس نے اُسے پانی پلاکر ٹھنڈا کیا ۔ مسکراتے ہوئے چائے بنانے چلی گئی۔ ناصر اخبار اٹھاکر پڑھنے میں محو ہوگیا۔ وہ خبریں بھی پڑھتا جارہا تھا اور سوچ بھی رہا تھا کہ آج کے لوگوں کو کیا ہوگیا ہے۔ آپس میں کیوں لڑ رہے ہیں۔ ملک کا کیا حال ہورہا ہے کسی کو اس کی فکر نہیں۔ سب اپنی جیبیں بھرنے میں لگے ہیں۔ سارے گھوٹالے ہمارے ہی ملک میں کیوں ہورہے ہیں۔ ہمارے لیڈروں کا ضمیر کتنا مردہ ہوگیا ہے۔ کہیں کہیں تو زِنا کے واقعات کثرت سے ہورہے ہیں۔ مذہبی تفرقہ کو ہوا دی جارہی ہے۔ اپنے بچاؤ کے لیے کیسی کیسی گھناؤنی سازشیں کرنے میں مصروف ہیں ہماری اعلیٰ کمان ۔ کہیں ریڈیو پر یہ گانا بج رہا تھا ؎ دیکھ تیرے سنسار کی حالت کیا ہوگئی بھگوان کتنا بدل گیا ہے انسان
صبح بڑی اجلی اجلی تھی۔ دونوں کے چہرے خوشیوں سے ایسے دمک رہے تھے جیسے سورج کی پہلی کرن سے سنسار دمکنے لگتا ہے۔ انھوں نے آفس جانے کی تیاری شروع کردی ۔ناصر کو آفس جلدی جانا تھا اُس لیے وہ سمرین کے لیے بغیر ہی چلا گیا۔ وہ اکیلی رہ گئی۔ آفس جانے میں ابھی دیر تھی۔ اُس نے سوچا کیوں نہ تھوڑی دیر بیٹھ کر اخبار کا مطالعہ کرلوں ۔ جیسے ہی اس کی نظریں جلی سرخیوں پہ آکر رک گئی اس میں لکھا تھا کہ ایک بوڑھے نے بارہ سالہ لڑکی کی عصمت دری کی۔ خبر پڑھ کر وہ سہم گئی۔ اس کے چہرہ پر ڈرو خوف کے سائے منڈرانے لگے۔ وہ اکثر آتے جاتے سفر کے دوران لوگوں کی ہوس بھری نظروں کو اپنے اندر اترتا محسوس کرتی۔ کبھی تو اس کو ایسا محسوس ہوتا کے یہ سارے مرد اپنی آنکھوں کے ذریعے اس کی لگاتارعصمت دری کر رہے ہیں۔ یہ سب سوچتے ہوئے وقت کا احساس نہیں رہا ۔
سمرین معمول کے مطابق بس اسٹاپ پر پہنچی ۔ وہاں بھیڑ کا یہ عالم تھا کہ تِل دھرنے کی بھی جگہ نہیں تھی۔ اس کو سب سے آخر میں کھڑے رہنے کی جگہ ملی۔ اس بھیڑ میں اُسے سب مرد ہی مرد نظر آرہے تھے۔ وہ اُن مردوں کا جائزہ لینے لگی۔ اُسے ایسا محسوس ہوا کہ ان مردوں کی آنکھوں میں اسے ہوس نظر نہیں آئی بلکہ ناصر کی طرح شرمیلا پن نظر آیا۔ اس نے لائن میں کھڑی دوسری عورتوں کی طرف دیکھا تو اُسے اُن کی آنکھوں میں ایک عجیب طرح کی ہوس نظر آئی۔ سمرین کو ایسا محسوس ہوا کہ یہ عورتیں بھی مردوں کو میری نگاہوں سے دیکھ رہی ہے۔ وہ سوچنے لگی کہ کم سے کم کوئی بوڑھا ہی ناصر کے اندر سما جائے ۔ وہ کبھی کبھی تو اپنے آپ کو بہت معذور محسوس کرتی ۔ وہ سوچتی کہ یہ ساری باتیں ناصر کو صاف صاف بتا دے۔ لیکن وہ اپنے آپ میں یہ سب کہنے کی ہمت نہیں جٹاپاتی۔ اس نے کئی مرتبہ یہ بھی سوچا کہ نوکری چھوڑ دے ۔ گھر کے حالات اور ناصر کی ضد کی آگے اس کی ایک نہ چلی۔
ناصر پر اپنے بوڑھے ماں باپ ، پانچ جوان بہنوں کی ذمہ داری بھی تھی۔ وہ سمرین کی تنخواہ میں گھر چلاتا اپنی تنخواہ اپنے بوڑھے ماں باپ کو گاؤں بھیج دیتا تھا۔ اُس نے کئی بار کوشش کی کہ اس کے ماں باپ بھی اسی کے ساتھ شہر میں رہے ۔ لیکن ساس اور پانچ نندوں کو برداشت کرنے کی ہمت سمرین میں نہیں تھی۔ اس نے ہمیشہ ناصر کی مخالفت ہی کی ۔
سمرین اور ناصر چھٹی کے دن چوپاٹی گئے ۔ شادی سے پہلے وہ روزانہ ہی چوپاٹی کی بکھری ریت پر بیٹھ کر سمندر کی موجوں میں گم ہوکر اپنے مستقبل کے لیے نئے نئے خواب بنتے ، سجاتے۔ سمرین ریت میں اپنے پاؤں دھنساکر ایک گھر بناتی اور اس سے کہتی دیکھو ہم اپنا گھر ایسا ہی بنائیںگے۔ آس پاس سے ایک گانے کی آواز آرہی تھی۔
؎ جھل مل ستاروں کا ایک آنگن ہوگا رم جھم برستا ساون ہوگا۔ گانا سن کر دونوں اپنے خوابوں میں کھو جاتے۔ جیسے جیسے وقت گزرتا گیا ان کی محبت بھی بڑھنے لگی۔ محبت کی بپھری ہوئی موجوں نے دونوں کو شادی کے بندھن میں باندھ دیا۔ وہ چوپاٹی کی ٹھنڈی ریت پھر بیٹھے ماضی کے خیالوں سے باہر آئے تو انھیں ایسا لگا کہ دنیا بہت بدل چکی ہے۔ سمندر کی موجوں میں پہلے جیسا جوش نہیں ہے۔ سمرین نے ریت میں پاؤں دھنسا کر گھر بنانے کی کوشش کی تو اسے لگا کہ وہ گھر نہیں بنا پائے گی۔ جب اس نے اپنے پیر ریت سے نکالے تو اسے محسوس ہوا کے پیر زمین کے اندر دھنستے جارہے تھے اور وہ بہت کوشش کہ باوجود بھی انھیں باہر نہیں نکال پارہی تھی۔ ناصر کی طرف دیکھا تو اسے سمندر کی موجوں میں گم پایا۔ اس کو سمندر کی موجوں سے کھینچ کر سمرین نے اپنی بانہوں کے حالے میں قید کرتے ہوئے کہنے لگی۔ ہم نے اپنے مستقبل کے بارے میں تو سوچا ہی نہیں ۔ میں چاہتی ہوں کہ آج کے بعد ہم اپنی زندگی کو خوشگوار بنانے کے لیے اولاد کی چاہت کرے۔جو ہمارے بڑھاپے کا سہارا بنے۔
ان کی سوچ آسمان کی اونچائی کو چھو رہی تھی۔دونوںایک دوسرے میں اس طرح کھو گئے کہ وقت گزرنے کا اندازہ بھی نہیں ہوا۔ ان کی شادی کو پانچ سال ہوگئے تھے۔ زمانے کی تلخیوں سے ہٹ کر اُن کے پیار میں جولانی تھی ۔ دونوں ایک دوسرے کی ضرورتوں کو سمجھتے تھے۔ اس نے ناصر کی دیکھ کر کہنے لگی ۔ ناصر… کیوں نہ ہم گھر چل کر اپنے بڑھاپے کے سہارے کے لیے کوشش کریں۔
ناصر نے سمرین کو پیار بھری نظروں سے دیکھا اور گویا ہوا … سمرین ابھی حالات ہمیں اس بات کی اجازت نہیں دیتے کہ گھر میں کوئی نیا مہمان آئے اور ہمارا خرچ بڑھا دے۔ پھر اس کی دیکھ ریکھ کے لیے بھی تو کوئی گھر میں چاہیے۔اُس نے ناصر کو دیکھ کر منہ تیڑھا کیا اور خاموشی سے خلاؤ ںمیں گھورنے لگی ۔ دور اُفق میں اُسے اپنے خواب منتشر ہوتے نظر آئے۔
دونوں جب گھر پہنچے تو کافی رات بیت چکی تھی ۔ دونوں کے بیچ ایک ہلکی سے دراڑ نظر آرہی تھی جسے ناصر محسوس نہیں کرسکا ۔ صبح کی ضروریات سے فارغ ہوکر ناصر کو آوازدی ناشتہ تیار ہے۔ دونوں نے ناشتہ ایسے کیا جیسے انھیں زبردستی ناشتے کے لیے بٹھادیا گیا۔ دونوںنے ایک دوسرے بہت کم بات کی اور آفس جانے کے لیے نکل پڑے۔ باہر کا سماں بھی کچھ تلخ تلخ سا نظر آریا تھا ۔ ہوائیں بھی بغیر کسی آہٹ کے ، بغیر کسی تغیر کے اپنا سفر طے کررہی تھیں۔
آفس پہنچ کر ناصر نے اخبار اٹھایا اس کی نظر اخبار کی جلی سرخیوں پہ پڑی۔ خبر تھی کہ کل رات چوپاٹی بیچ پر ایک نا بالغ و معصوم لڑکی کی مسخ شدہ لاش ملی۔ پولیس کی خبر کے مطابق پہلے اس کی عصمت دری کے بعد اس کا قتل کر دیا گیا۔ یہ خبر پڑھ کر وہ دہل گیا ۔ کچھ دیر کے لیے اس پر سکتہ طاری ہوگیا۔ ا سے کل چوپاٹی بیچ کی شام یاد آرہی تھی ۔ وہ سوچ رہا تھا کہ اگر اس نے سمرین کو وہاں کچھ پل کے لیے بھی اکیلا چھوڑا ہوتا تو ہوسکتا تھا کہ یہ ہیبت ناک واقعہ اُس کے ساتھ پیش آیا ہوتا تو کیا کرتا۔ ہمارا معاشرہ کتنا خونخوار ہوتا جارہا ہے۔
یہ خبر پورے ملک میں فیس بک اور واٹس آپ کے ذریعے پھیلتی جارہی تھی ۔ سمرین نے یہ خبر پڑھی اور اُس کا دل خوف سے کانپ اُٹھا۔ اپنے آپ کو وہ بالکل معذور سا محسوس کرنے لگی اور سوچنے لگی کہ انسان کتنا بدلتا جارہا ہے۔ درندوں کی صفت اس میں کہاں سے آتی جارہی ہے ۔جب وہ آفس سے گھر جانے کے لیے نکلی تو راستے میں ایسا لگا کہ کوئی اس کا تعاقب کررہا ہو۔ جب وہ بس میں سوار ہوئی تو اس نے دیکھا کہ بس میں اکیلی ہے۔ بس مردوں سے بھری ہوئی ہے۔ اس نے سارے مردوں کو اپنی طرف ہوس بھری نگاہوں سے دیکھتے ہوئے پایا ۔اسے ایسا لگا کہ جیسے آسمان میں اڑتا ہوا باز زمین پر اپنے شکار کو دیکھ کر اس پر جھپٹ پڑنے کے لیے پَر تولتا ہے۔ اس کے چہرے پر ڈروخوف کے آثار پھیلنے لگے۔ وہ سوچنے لگی کہ کہیںدلّی میں ہوئے ہولناک ، ہیبت ناک حادثہ کی طرح اس کے ساتھ بھی نہ پیش آئے۔ وہ لوگو کے نگاہوں میں بسی درندگی کو دیکھ کر سہم گئی۔ کیوںکہ وہ جانتی تھی کہ چہرہ انسان کی اضطرابیت کو ظاہر کردیتا ہے۔ چہرے ہی تو انسان کو بے قابو ہونے پر مجبور کردیتے ہیں۔آج تک جتنے بھی واقعات ہوئے ان سب کے محرک چہرے ہی تو بنے ہیں۔
سمرین جب گھر پہنچی تو ناصر کو گھر میں موجود پایا۔ وہ اُس کی آنکھوں میں دیکھنے لگی۔ وہ شاید اس کی آنکھوں میں وہی درندگی دیکھنا چاہتی تھی جو اس نے بس میں سوار لوگوں کے آنکھوں میں دیکھا تھا۔ لیکن اُس کی آنکھوں میں اسے کچھ بھی ایسا نظر نہیں آیا۔ سمرین کے دماغ میں ناصر کے متعلق بہت کچھ چل رہا تھا۔ کیوں کہ اُس نے چوپاٹی پر بیٹھ کر سمرین کی کئی خواہشوں کو ریت میں دفن کردیا تھا۔ وہ سوچنے لگی کہ کاش کوئی درندہ ہی ناصر کے اندر اتر آئے۔
——————————————–
یہ افسانہ معروف واہٹس ایپ گروپ ’’ بزمِ افسانہ‘‘ کے توسط سے پیش کیا جارہا ہے۔

بوڑھے نے بڑی احتیاط سے ہونٹوں کے ایک کونے میں بیڑی دبائی اور پھر سے وہی قصہ چھیڑا۔ یہ قصہ سناتے وقت بوڑھے پر ایک اضطرابی کیفیت چھا جاتی تھی۔

’’چاردوست تھے۔ چاروں نے بھگوان وشو کرما سے پرارتھنا کی۔ اے بھگوان! ہمیں کوئی انوکھا فن سکھلادے۔ بھگوان وشوکرمانے ان کی پرارتھنا سوئیکار کرلی۔ انھیں بارہ برس تک سکھاتے رہے۔ وہ بھی پورے جی جان سے سیکھتے رہے ۔ پہلے نے ہڈیاں جوڑ جوڑ کر ڈھانچہ بنانا سیکھا۔ دوسرے نے اس پر ماس جمانا سیکھا، تیسرے نے اس پر چمڑے کا غلاف چڑھانا سیکھا۔‘‘

حسب عادت بوڑھے نے کئی باریہ قصہ دہرایا اور خاموش ہوگیا۔ بوڑھے کو خاموش دیکھ کر اس مرتبہ بھی لڑکے کو تجسس ہوا! اس نے پھروہی سوال پوچھا، ’’اور چوتھے نے؟‘‘

بوڑھا گم صم کھڑا رہا۔ وہ شاید چوتھے فن کار کے بارے میں کچھ بتانا نہیں چاہتا تھا یا پھر اسے اس کے بارے میں کوئی علم ہی نہ تھا۔

لڑکے کا تجسس ہنوز برقرار تھا اورجب بوڑھے کو اس کے تجسس کا احساس ہوا تو اس نے بیڑی کے ٹکڑے کو پھونک مار کر پھینکا اور کہا، ’’ابے !گھبراتا کیوں ہے؟ اس کے بارے میں بھی بتاؤں گا! دھیرج دھر!! ‘‘

اور لڑکا پھر سے بانس کی ٹھٹری میں پوال باندھنے لگا۔ بوڑھے نے ایک اور بیڑی سلگائی۔ جلدی جلدی دو چار کش لگائے، کمر میں گمچھا باندھا، انگلیوں کے درمیان اپنے پچکے گال رکھے، داڑھی کے بال اینٹھے، تھوڑی دیرکچھ سوچا اور کام میں جٹ گیا۔

اب اس کا ہاتھ تیزی سے چل رہاتھا۔ رفتہ رفتہ پوال نظروں سے اوجھل ہورہی تھی۔ وہ بائیں ہاتھ سے ڈھانچے کو سہارا دیئے دائیں ہاتھ سے مٹی تھوپ رہاتھا۔ ہتھیلی کے نچلے حصے سے تھپکیاں بھی لگا رہاتھا۔ جہاں مٹی زیادہ ہو جاتی وہاں انگلیوں سے کاڑھ لیتا، جہاں مٹی کم پڑ جاتی وہاں چپکا دیتا۔ رہ رہ کر بیڑی کاسرا انگارے کی طرح دھکنے لگتا اور دوسرے ہی لمحہ اس پر راکھ کی تہہ جم جاتی۔

لڑکا پوال باندھ رہا تھا لیکن نظریں بوڑھے کی ہتھیلیوں اور انگلیوں کی جنبش پر ٹکی ہوئی تھیں۔

اورجب بوڑھا لڑکے کو دیکھتا تو مسکرا دیتا۔ ہاتھ کی طرف اشارہ کرتے ہوئے کہتا، ’’ابے ، مورتی ہاتھ میں نہیں ہوتی ہے۔‘‘ اور پھر دایاں ہاتھ سینے پر زور سے تھپک کر کہتا، ’’مورتی یہاں ہوتی ہے۔ سمجھا، یہاں، اس کے اندر!‘‘

لڑکا حیرت سے بوڑھے کا سینہ تکنے لگتا۔ اوبڑ کھابڑ ،ہڈیاں ہی ہڈیاں ،گوشت کا نام و نشاں نہیں!! بوڑھے کاہاتھ تیزی سے چلنے لگا۔

اور جب بانس کی ٹھٹری پر پوال باندھنے کا کام مکمل ہو گیا تو لڑکے نے ڈھانچے کو گھما پھرا کر دیکھا۔ جسم کے نشیب و فراز کامختلف زاویوں سے معائنہ کیا۔ انگلیوں سے کھینچ تان کر ڈوری کے دم خم کاجائزہ لیا۔ ’’بابا کو ایسا ہی کسا ہوا ڈھانچہ پسند ہے۔‘‘ اس نے من ہی من کہا اور پھر سے بوڑھے کو ٹکٹکی باندھے دیکھنے لگا، ’’بابا کے ہاتھوں میں جادو ہے! چھوتے ہی ہاتھ، پاؤں، پیٹ، سینہ، نابھی، گردن سب ایک ایک کر کے ماٹی سے نکلنے لگتے ہیں!! ‘‘

بوڑھے نے چھاتی پر مٹی تھوپ کر چھوٹے چھوٹے دو ٹیلے بنادیئے تھے۔ اب وہ ان ٹیلوں پر ہتھیلیاں پھیررہاتھا اور جب وہ ایسا کرتا تھا تو اس پر عجیب سی ایک کیفیت طاری ہو جاتی تھی۔ چہرہ تمتمانے لگتاتھا۔ آنکھوں کی پتلیاں ناچنے لگتی تھیں، ہونٹ کپکپانے لگتے تھے۔ سانس ٹوٹنے لگتی تھی۔ پہلے پہل لڑکے نے گھبرا کر اسے جھنجوڑا تھا۔ جواباً نرم اور نازک رخسار پر طمانچہ کھایا تھا۔ اس کے بعد کبھی اس کی ہمت نہیں ہوئی کہ وہ ایسی حالت میں بوڑھے کے قریب پھٹکے۔

اورجب سینے کا تناؤ پوری آب و تاب سے نمایاں ہو جاتا تو بوڑھے کے چہرے پر سرور و انبساط کی ہزاروں لہریں دوڑ جاتیں۔ وہ مسکراتے ہوئے لڑکے کی طرف دیکھنے لگتا۔ سو اس نے اس بار بھی دیکھا۔ صرف دیکھا ہی نہیں بلکہ ایک بے تکا سا سوال بھی پوچھ لیا، ’’اچھا، بتا تو بے، تو نے کبھی کسی ناری کا سریر دیکھا ہے؟ ایک دم ننگ دھڑنگ سریر!! ‘‘

لڑکاہکّا بکّا بوڑھے کو تکنے لگا۔ وہ تو اس کی بڑی عزت کرتا تھا۔ اسے بھگوان سمجھت اتھا۔ بھلا بھگوان بھی اس طرح کے سوال کرتے ہیں!! لڑکا پس و پیش میں پڑ گیا۔

’’کیا بے، جواب کیوں نہیں دیتا؟‘‘

لڑکے سے کچھ کہا نہ گیا۔

پاٹ اور مٹی کا گلاوا گڑھے میں پڑا پڑا سڑ چکا تھا۔ بدبو آنے لگی تھی۔ نالے میں کیچڑ کے سڑ جانے سے بھی ایسی ہی بدبوآتی ہے۔ بدبو لڑکے کے نتھنوں کو چھونے لگی اور یکسر اس کی نظروں کے سامنے کا منظر بدل گیا!!

**

بھادوں کی امس اور ہوا بند! گرمی ایسی کہ دم گھٹ جائے۔ سڑک اور فٹ پاتھ کے درمیان چوڑا ایک نالہ، کیچڑ سے اٹا ہوا۔ نالے کا پانی سڑ چکا ہے۔ چھوٹے چھوٹے کیڑے کلبلا رہے ہیں۔ ناک نہیں ٹھہرتی۔ نالے سے لگا ایک چھوٹا سا جھونپڑا ہے ۔ جھونپڑے میں بچہ ماں کی چھاتی سے چپکا سو رہا ہے۔ اچانک بچے کی آنکھیں کھل گئیں۔ وہ حیرت میں پڑ گیا۔ اسے محسوس ہوا کہ اب وہ راستے پر اکیلا پڑا ہے۔ چاند میں بیٹھی بڑھیا چکی پیس رہی ہے۔ ہر طرف چاندنی پھیلی ہے۔

’’میں یہاں کیسے ؟ ‘‘ بچہ اپنے ننھے سے ذہن کو جھٹکتا ہے۔ لیکن اس کی سمجھ میں کچھ نہیں آتا۔اس کی نگاہ جھونپڑے پر پڑتی ہے۔ ایک شخص جھونپڑے سے باہر آتا ہے اور لنگی باندھتا ہوا پُر پیچ راستوں میں گم ہو جاتا ہے۔ بچہ جھونپڑے کی طرف لپکتا ہے اور جیسے ہی قدم اندر رکھتا ہے ٹھٹک کر رہ جاتا ہے۔ ماں کے جسم پر ایک دھاگا بھی نہیں۔ وہ آہٹ سنتی ہے۔ بدن پر ساری کھینچ لیتی ہے۔ پیٹھ پھیر کرسو جاتی ہے۔ بچہ کھڑا کانپنے لگتا ہے۔

لڑکا بھی کانپنے لگا۔ بوڑھے نے سوال دہرایا، ’’کیابے! جواب کیوں نہیں دیتا، دیکھا ہے؟‘‘

لڑکے نے نفی میں سر ہلایا۔

بوڑھے نے کہا ،’’جا پہلے دیکھ کر آ، پھر میں تجھے آگے کا سبق سکھاؤں گا۔۔۔۔ اور ہاں سن جیسے تیسے مت دیکھنا۔ غور سے دیکھنا۔ ایک ایک چیز دیکھنا، اچھی طرح سے دیکھنا۔ بھوئیں کتنی کھنچی ہوئی ہیں، پیشانی کتنی چوڑی ہے ، گردن کوتاہ ہے یا صراحی دار، پیٹ پر بل کتنے ہیں، چھاتیاں تنی ہوئی ہیں یا جھولی ہوئیں ، پھول نیلا ہے یا بھونرا ، ہونٹ گلابی ہیں یا کتھئی، نابھی گہری ہے یا ابھری ہوئی۔ ٹانگیں چکنی ہیں یا روئیں دار…‘‘

لڑکے کی سمجھ میں کچھ نہیں آ رہا تھا۔ وہ بوڑھے کو حیرت بھری نگاہوں سے دیکھنے لگا۔ بوڑھے نے مزید کہا، ’’سن ماٹی کو ہاتھ لگانے سے پہلے دونوں آنکھیں بند کر لینا۔ ذہن کے پردے پر اس ننگ دھڑنگ ناری کی چھبی دیکھنا۔ آنکھ، ناک، کان، ہونٹ، کپال، کندھا، چھاتی، پیٹ، نابھی، چوتڑ، کمر، ٹانگیں، بانہیں سب اچھی طرح من میں بسا لینا۔ اس کے بعد بچالی (پوال) کے اس ڈھانچے میں ماٹی جماتے جانا۔ یاد رہے نظروں سے وہ چھبی اوجھل نہ ہونے پائے۔‘‘

بوڑھا تھوڑی دیر خاموش رہا۔ پھر مسکرایا اور بولا، ’’اچھا ایک کام کر، ماٹی میں چال کی تھوڑی سی بھوسی اور ملادے ۔‘‘

لڑکے نے پوچھا،’’اور پاٹ؟‘‘

’’نہیں پاٹ ملانے کی ضرورت نہیں۔‘‘

لڑکا مٹی کے گڑھے میں بھوسی ڈال کر کچھ دیر پیروں سے رَلایا پھر دھیمی آواز میں بولا، ’’بابا، ایک بات پوچھوں؟ ‘‘

بوڑھے نے اثبات میں سر ہلادیا۔

لڑکے نے پوچھا،’’بابا، آپ کی ماں نہیں ہے؟ ‘‘

’’ارے جب تیری ماں نہیں ہے تو مجھ جیسے بوڑھے کی ماں کیسے ہو سکتی ہے! ہاں، ایک بیوی ضرور ہے لیکن میرے ساتھ رہنا اسے گوارا نہیں۔ وہ جو کھال کے پاس نیا اسٹیشن بنا ہے۔ کولکاتا اسٹیشن! حرام زادی، وہیں رہتی ہے۔ دارو بیچتی ہے اور سنا ہے، دھندہ بھی کرتی ہے۔ ریلوے کے جتنے سپاہی ہیں اس کے گاہک ہیں۔ ان کے ساتھ سوتی ہے۔ سوتی رہے سالی، میں کسی کی پروا نہیں کرتا۔۔۔۔ اور تو سن عورتوں کا صرف بدن دیکھنا، غور سے دیکھنا، ایک ایک انگ دیکھنا لیکن خبردار ان کے ساتھ سونا نہیں! عورت کے ساتھ سونے سے آدمی نشٹ ہو جاتا ہے! کسی کام کا نہیں رہتا!‘‘

بوڑھے کا لہجہ بھرّا گیا۔ آنکھیں نم ہونے لگیں۔ رات بھر بوڑھا اسی طرح بکتا رہا۔ خوب دارو پیتارہا۔ اوراپنی بیوی کو گالیاں دیتا ہوا زمین پر بدحواس سو گیا۔

**

بوڑھا دن چڑھے تک سوتا رہتا تھا۔ اس نے پارک کی پچھلی باونڈری وال سے پولیتھین باندھ کر چھوٹی سی ایک جھونپڑی بنا رکھی تھی۔ جھونپڑی کے سامنے ہی وہ مورتیاں بناتا تھا۔ پارک کے دوسرے سرے پر واٹر سپلائی کے پائپ میں ایک جوڑ تھا جس سے خاصا پانی رستا تھا۔ تھوڑی دور فٹ پاتھ کی بائیں طرف کئی جھونپڑیاں تھیں۔ ان جھونپڑیوں میں رہنے والے صبح ہی سے وہاں بھیڑ لگا دیتے تھے۔ عورتیں برتن اور کپڑا دھونے بیٹھ جاتیں، تو ٹلنے کا نام ہی نہیں لیتی تھیں۔ لڑکا علی الصباح جاگ جاتا اوروہاں سے پرانے پلاسٹک کے جار میں پانی بھر لاتا۔ گڑھے میں مٹی اور پانی ڈال کر پیروں سے گوندھتا۔ غرض یہ کہ بوڑھے کے جاگنے تک اوپر کا تمام کام نپٹا دتیا تھا۔ گڑھے میں سوکھی مٹی ڈال کرجب وہ پانی ملاتا تو آس پاس کی فضا سوندھی سوندھی خوشبو سے مہک اٹھتی تھی۔ لڑکے کو یہ خوشبو اچھی لگتی تھی ۔ بملا کو بھی بھاتی تھی۔

ہاں، وہاں چھوٹی سی ایک بچی بھی رہتی تھی۔اس کی پیاری پیاری باتیں لڑکے کو کھینچنے لگیں۔ ایک دن اس نے بچی سے کہا،’’میرے ساتھ چل، ماٹی کی گڑیاں دوں گا۔‘‘

اور جب بچی آتی تو وہ اسے چھوٹی چھوٹی گڑیاں بنا کر دے دیتا تھا۔ اگرچہ ان گڑیوں میں ہزاروں عیب ہوتے تھے، لیکن بچی انھیں بڑے چاؤ سے لے لیتی تھی ۔

شروع شروع میں تو وہ گڑیوں کے لالچ میں چلی آتی تھی لیکن رفتہ رفتہ اس کا ذہن بڑی بڑی مورتیوں کی طرف مائل ہونے لگا۔ وہ گھنٹوں بوڑھے کو مورتیاں بناتے دیکھا کرتی تھی۔ اپنی پیاری پیاری باتوں سے بوڑھے کا بھی من موہ لیتی تھی۔

اور جب بوڑھا وہی پرانا قصہ سناتا تو وہ بھی غور سے سنتی؛

’’چار دوست تھے۔ چاروں نے بھگوان وشو کرما سے پرارتھنا کی۔ اے بھگوان ! ہمیں کوئی انوکھا فن سکھلا دے۔ بھگوان وشوکرما نے ان کی پرارتھنا سوئیکار کر لی۔ انھیں بارہ برس تک سکھاتے رہے۔ وہ بھی پوری جی جان سے سیکھتے رہے ۔ پہلے نے ہڈیاں جوڑ جوڑ کر ڈھانچہ بنانا سیکھا۔ دوسرے نے اس پر ماس جمانا سیکھا، تیسرے نے اس پر چمڑے کا غلاف چڑھاناسیکھا۔‘‘

اور جب بوڑھا خاموش ہو جاتا تو لڑکے کے ساتھ ساتھ وہ بھی تجسس بھرے لہجے میں وہی سوال دہراتی،’’اور چوتھے نے؟‘‘

جب بوڑھے سے کوئی جواب نہیں بن پاتا تو بچی بے باکی سے کہتی،’’ چھوڑیئے چھوڑیئے ،آپ کو پتہ نہیں ہے!‘‘

لیکن بوڑھا اس کی بات کا برا نہیں مانتا تھا، بس ہنس دیتا تھا۔

***

بچی روزانہ صبح سویرے آنکھیں ملتی ہوئی چلی آتی تھی اور لڑکے کے ساتھ بیٹھ کر کبھی گڈا، کبھی گڑیا، کبھی توتا، کبھی مینا، کبھی شیر اور ہاتھی بنایا کرتی تھی۔ سامنے سیمنٹ کا ایک بوسیدہ ڈرین پائپ پڑا تھا۔ وہ اس پر بیٹھ جاتی اور دیر تک اس سے باتیں کیا کرتی تھی۔

ایک دن لڑکے نے کہا، ’’ بملا، دیکھ میں نے رات بھر جاگ کر تیرے لیے ماں کالی کی پرتیما بنائی ہے۔ دیکھ اس کی زبان دیکھ، کتنی لمبی ہے!! اس کے گلے میں منڈیوں کی یہ مالا دیکھ !! کتنی محنت سے ایک ایک سر بنایا ہے۔ انھیں دھاگے میں پرویا ہے۔ دیکھ ، اس کے ایک ہاتھ میں کٹی ہوئی ایک بڑی سی منڈی لٹکاؤں گا اوردوسرے میں یہ داؤ۔۔۔۔ اور یہ سیار بھی بنایا ہے، جو منڈی سے ٹپکنے والا خون چاٹے گا۔ اور دیکھ یہ بابا بھولے ناتھ کا پتلا ہے ۔ اسے چت لٹا کر ماں کالی کی پرتیما اس پررکھ دوں گا۔۔۔۔۔‘‘

بچی نے ہونٹ بچکا کر کہا، ’’نہیں ،ٹھیک نہیں ہوا۔ ماں کالی کے تو چار ہاتھ ہوتے ہیں، اس کے دو ہیں۔ شیو ٹھاکر کی جٹا بھی نہیں ہے۔ شیر کی چھال کہاں ہے؟‘‘

لڑکا اداس ہو گیا۔ اس نے تمام مورتیاں توڑ ڈالیں۔

ویسے بھی وہ ہر روز بوڑھے کے جاگنے سے پہلے اپنی بنائی ہوئی تمام مورتیاں توڑ کر گڑھے میں ڈال دیتا تھا اور مٹی کو اس طرح ملا دیتا تھا کہ بوڑھے کو اس کی بھنک بھی نہیں مل پاتی تھی۔ اسے ڈر تھا ،کہیں بوڑھا ناراض نہ ہو جائے۔

دوسرے دن پھر بچی آئی۔ ابھی وہ ڈرین پائپ پر ٹھیک سے بیٹھی بھی نہ تھی کہ لڑکے نے مسکرا کر کہا، ’’بملا، آنکھیں بند کر !‘‘

بملانے آنکھیں بند کرلیں۔کچھ دیر بعد لڑکے نے کہا، ’’اب کھول ! دیکھ آج میں نے کیا بنایا ہے؟ بتا تو یہ کس کی مورتی ہے؟‘‘

بچی کے چہرے پر اتنی حیرت نہ تھی جتنا کہ اس نے امید لگائی تھی۔ بچی تتلاتے ہوئے بولی ،’’لگتی تو درگا جیسی ہے۔ لیکن…‘‘

بچی غور سے مورتی دیکھنے لگی اورگال پر دایاں ہاتھ رکھ کرشہادت کی انگلی ہلاتے ہوئے کچھ سوچنے لگی۔ لڑکے کا تجسس بڑھ گیا۔

’’لیکن !‘‘

لڑکے نے بڑی بے صبری سے پوچھا،’’لیکن کیا؟‘‘

’’لیکن۔۔۔۔ اس کی ناک میں نتھ اور کانوں میں مندری کہاں ہے؟ ماتھے پرٹیکا، گلے میں ہار، ہاتھ میں چوڑی، پاؤں میں پائل، بھی نہیں۔ دھت یہ بھی کوئی ماں درگا ہوئی۔‘‘

اس بار بھی لڑکا اداس ہو گیا۔ اس نے یہ مورت بھی گڑھے میں ڈال دیا اسے مٹی میں ملا دیا۔ لڑکے کو اداس دیکھ کر بچی نے کہا،’’جب میں بڑی ہو جاؤں گی تو میں ناک میں نتھ، کان میں جھمکے،ہاتھ میں چوڑی پہنوں گی۔ گلے میں ہار، ماتھے پر ٹیکا، پاؤں میں پائل بھی پہنوں گی۔‘‘

لڑکا سوچنے لگا، ’’جب بملا بڑی ہوجائے گی تو وہ کس کی طرح دکھے گی؟ درگا ماں کی پرتیما کی طرح، کالی مائی کی پرتیما کی طرح یا پھر ماں سرسوتی کی پرتیما جیسی؟ کیا اس کا کولھا اور سینہ بھی اسی طرح ابھر آئے گا۔ کیا اس کا جسم بھی اسی طرح کا ہو جائے گا جیسا بابا کو اپنی پرتیماؤں کے لیے پسند ہے۔ نہیں نہیں، وہ پرتیمائیں تو بول نہیں سکتیں۔ سب کی سب بے جان ہیں۔ ان میں آتما کہاں؟ میری بملا تو بولتی ہے! ٹپ ٹپ بولتی ہے، مینا کی طرح!! یہ تو زندہ ہے۔ ‘‘

لیکن افسوس کہ اس کی مینا زیادہ دنوں تک زندہ نہ رہ سکی!!

ہوا یوں کہ اس علاقے میں تیزی سے مہاماری پھیلنے لگی! بھادوں کے مہینے میں یہاں اکثر ایسا ہوتاتھا۔ جب وہ کئی روز تک نہیں آئی تو لڑکے کو فکر لاحق ہوئی۔ وہ اس کے گھر پہنچ گیا۔ بملا بے ست پڑی تھی۔ جسم پر لال لال چٹّے پڑ گئے تھے۔ لڑکے کو دیکھ کراس کے چہرے پر پھیکی سی مسکراہٹ ابھری۔ لڑکے نے پوچھا،’’بملا، بڑا کشٹ ہو رہا ہے کیا؟”

بملا کچھ نہیں بولی۔ اس نے اثبات میں صرف دھیرے سے گردن ہلا دی۔ سرہانے اس کی ماں بیٹھی سر پر پانی پٹّی چڑھا رہی تھی۔ سسکتے ہوئے بولی، ’’کئی دنوں سے بخار لگا ہے۔ اترنے کا نام نہیں لیتا۔ کہتی ہے، سر میں بہت دردہے! بدن کاجوڑ جو ڑ دکھ رہاہے!!‘‘

لڑکے سے اس کی حالت دیکھی نہیں گئی۔ اس نے دل ہی دل پرارتھنا کی،’’اے ٹھاکر، میری بملا کو اچھا کر دے…!!‘‘

اس کے بعد وہ روزانہ جانے لگا۔ بملا کی ماں نے منع کیا،’’بیٹا، تواس کے پاس مت جایا کر۔ اسے چھوت کی بیماری ہوگئی ہے۔ تجھے بھی ہو جائے گی۔‘‘

لیکن لڑکا کب ماننے والاتھا۔ وہ بملا کی ہتھیلیاں اور تلوے سہلاتا، سر پر پٹی چڑھاتا۔ گھنٹوں اس کے سرہانے بیٹھا رہتا۔ کہتا،’’بملا، تو جلدی سے ٹھیک ہو جا۔ میں اس دفعہ تیری مورتی بناؤں گا۔‘‘

لیکن اس کی بملا ٹھیک نہیں ہوئی۔ اسے قے آنے لگی۔ پیٹ میں شدیددرد شروع ہوگیا۔ ناک اور منہ سے خون بہنے لگا۔ جسم زرد پڑتا گیا۔ لوگوں نے کہا، ’’ڈینگو بخار ہوا ہے۔ یہ نہیں بچے گی۔‘‘

اور واقعی وہ نہیں بچی۔ لوگوں کاماننا تھا کہ مہاماری میں مرنے والے بچے کی لاش جلانی نہیں چاہئے۔ سچ تو یہ تھا کہ اس کی غریب ماں کے پاس اتنا پیسہ ہی کہاں تھا کہ وہ لکڑیاں خریدتی۔ اپنی بچی کی چتا جلاتی ۔ چنانچہ اس کی لاش نہر کنارے مٹی میں دبا دی گئی۔ لڑکا پھر سے تنہا ہو گیا۔ اب اس کا جی کسی کام میں لگتا نہ تھا۔ بچی کی موت کا صدمہ بوڑھے کو بھی کم نہ تھا لیکن وہ اس صدمے کو دل میں دبائے لڑکے کو بہلانے کی کوشش کرتا۔ اس نے ایک بارپھر وہی قصہ چھیڑا؛

’’چاردوست تھے ۔چاروں نے بھگوان وشو کرما سے پرارتھنا کی۔ اے بھگوان! ہمیں کوئی انوکھا فن سکھلادے۔ بھگوان وشوکرما نے ان کی پرارتھنا سوئیکار کر لی۔ انھیں بارہ برس تک سکھاتے رہے۔ وہ بھی پوری جی جان سے سیکھتے رہے ۔ پہلے نے ہڈیاں جوڑ جوڑ کر ڈھانچہ بنانا سیکھا۔ دوسرے نے اس پر ماس جمانا سیکھا، تیسرے نے اس پر چمڑے کا غلاف چڑھانا سیکھا۔‘‘

لیکن اس بار بوڑھے کو خاموش دیکھ کر اس نے اپنا سوال نہیں دہرایا۔

اورتب بوڑھے نے کہا، ’’ آ، میں تجھے ماس جمانا اور چمڑے کا غلاف چڑھانا سکھلا دوں ۔‘‘

لیکن لڑکا تو کسی اور خیال میں گم تھا۔ خاموش کھڑا رہا۔

دوسرے دن وہ نہر کنارے اداس بیٹھا ہوا تھا کہ اچانک اس کی نگاہ پیلی سی ایک چیز پر پڑی۔ اس نے غور سے دیکھا، ’’کہیں یہ بملا کے پیر کی ہڈی تو نہیں؟ تو کیا جانوروں نے اس کی قبر کھود کر اس کی لاش کھا لی ہے!!‘‘

ہاں، بملا کی لاش کے ساتھ ایسا ہی ہوا تھا۔ اس نے ایک ایک ہڈی ڈھونڈی اور انھیں اٹھا کر لے آیا۔

چاندنی رات تھی۔ لڑکے نے آسمان کی طرف نگاہ کی۔ دور دور تک بادل کانام و نشاں نہ تھا۔ چاند پوری آب و تاب سے چمک رہا تھا مگر درخت کا ایک پتا بھی نہیں ہل رہا تھا۔ فضا میں عجیب سی گھٹن تھی۔

وہ کچھ دیر تک ٹکٹکی باندھے چاند کو تکتا رہا۔ بڑھیا چاند میں بیٹھی چکّی پیس رہی تھی۔ پھر اس نے جھونپڑے کی طرف دیکھا۔ بوڑھا ہر دن کی طرح آج بھی دارو پی کر اوندھا پڑا ہوا تھا۔

لڑکا ہڈیاں جوڑتا گیا اور بڑبڑاتا گیا، ’’پہلے نے ہڈیاں جوڑ جوڑ کر ڈھانچہ بنایا…!‘‘

اورجب ہڈیوں کا ڈھانچہ بن گیا تو لڑکا اس ڈھانچے پر مٹی تھوپتا گیا اور بڑبڑاتا گیا، ’’پہلے نے ہڈیاں جوڑ جوڑ کر ڈھانچہ بنایا، دوسرے نے ماس جمایا …!‘‘

اب وہ مورتی کو ہتھیلیوں سے لیپ رہا تھا اور بڑبڑاتا جارہا تھا، ’’پہلے نے ہڈیاں جوڑ جوڑ کر ڈھانچہ بنایا،دوسرے نے ماس جمایا، تیسرے نے غلاف چڑھایا … ‘‘

**

پوَ پھٹ چکی تھی۔ فضا میں گھٹن کا احساس بڑھنے لگا تھا۔ ہمیشہ کی طرح آج بھی بوڑھا خوابِ غفلت میں پڑا تھا کہ اچانک اس کے کانوں میں ایک آواز آئی۔ وہ چونک کر جاگ گیا۔

پہلے تو اسے یقین ہی نہ ہوا۔ اس نے ہتھیلیوں سے آنکھیں ملیں، کان سہلائے اور اپنے آپ سے کہا، ’’نہیں، یہ خواب نہیں! یہ خواب نہیں ہے!!‘‘

بوسیدہ ڈرین پائپ پر بملا کی پرتیما تھی!! لڑکا پرتیما کے سامنے نیم بے ہوشی کے عالم میں پڑا تھا۔ وہ بڑبڑاتا جا رہا تھا، ’’پہلے نے ہڈیاں جوڑ جوڑ کر ڈھانچہ بنایا، دوسرے نے ماس جمایا، تیسرے نے غلاف چڑھایا۔ پہلے نے ہڈیاں جوڑ جوڑ کر ڈھانچہ بنایا، دوسرے نے ماس جمایا، تیسرے نے غلاف چڑھایا… ‘‘

بوڑھے کے رونگٹے کھڑے ہو گئے۔ وہ ڈرتا ڈرتا پرتیما کے قریب آیا۔ دم بخود کچھ دیرتک اسے دیکھتا رہا۔ پھر لڑکے کی طرف مڑا۔ا سے ہاتھ جوڑ کر پرنام کیا! پھوٹ پھوٹ کر رونے لگا!! اوردھم سے اس کے قدموں پر گر پڑا !!!

پرتیما اب بھی بول رہی تھی،’’ اور چوتھے نے روح پھونکی!۔۔۔۔۔۔ اور چوتھے نے روح پھونکی۔۔۔۔۔!!!‘‘
————————————–
یہ افسانہ معروف واہٹس ایپ گروپ ’’ بزمِ افسانہ‘‘ کے توسط سے پیش کیا جارہا ہے۔