Urdu Zaban ki Taraqqi

Articles

اردو زبان و ادب کی ترویج و ترقی میں ایک اور پیش قدمی

وسیم عقیل شاہ

جلگاؤں 2 ستمبر 2018 : آئیڈیل ملٹی پرپز سوسائٹی، جلگاؤں کے زیر انصرام تقریب بہ عنوان ” اردو زبان و ادب کی ترویج و ترقی کے عملی اقدامات” کا انعقاد ادارہ ہذا کے دفتر میں انتہائی تزک و احتشام کے ساتھ عمل میں آیا ـ حافظ جنید صاحب نے تلاوت کلام پاک سے محفل کا آغاز کیا ـ ادارے کے صدر محمود بھائی نے ابتدائی کلمات ادا کیے اور شہر میں سابقہ طرز پر ماہانہ نشستوں کے اہتمام کی یقین دہانی کرائی ـ  اس پروگرام کے روح رواں صغیر احمد صاحب نے پروگرام کے اغراض و مقاصد پیش کیے ـ ضلعی سطح پر اردو زبان و ادب کی موجودہ صورتحال کے پیش نظر منعقد اس جلسے میں بطور مہمانِ خاص تشریف فرما اردو کے معروف افسانہ نگار رشید قاسمی نے اپنے خیالات کا اظہار کرتے ہوئے مطالعہ کی افادیت سے روشناس کرایا اور اردو کی ترویج کے لیے منظم اور با مقصد نشستوں کے پابندی سے جاری رکھنے کی بات کہی ـ اس موقع پر آل انڈیا ریڈیو آکاش وانی سے منسلک جاوید انصاری صاحب نے دو ٹوک انداز میں ادبی بد عنوانیوں کی طرف اشارہ کیا اور ادب میں شفافیت لانے کے لیے بنیادی مسائل کے حل تلاش کرنے پر زور دیا ـ بھساول سے تشریف فرما حاجی انصار نے عصری ادب کے ساتھ ہی عصری تعلیم کے حوالے سے اپنے تاثرات پیش کیے ـ اس پروگرام کی صدارت فرما رہے ڈاکٹر قاضی رفیق راہی (ڈپٹی رجسٹرار، نارتھ مہاراشٹر یونیورسٹی) نے اپنے خطبہ صدارت میں زبان و ادب کے متنوع موضوعات کو سمیٹا اور ادب کے بیشتر مگر پوشیدہ پہلوؤں کو واضح کرنے کی کوشش کی ـ قاضی صاحب نے یہ بھی کہا کہ اس وقت ادب کی ترویج و ترقی میں حائل دشواریوں کا سامنا ہمیں پوری اجتماعیت کے ساتھ کرنے کی ضرورت ہے ـ اس موقع پر ڈاکٹر قاضی رفیق راہی کے نارتھ مہاراشٹر یونیورسٹی میں ڈپٹی رجسٹرار کے عہدے پر فائز ہونے کی خوشی میں آئڈیل ملٹی پرپز سوسائٹی کی جانب سے موصوف کا شال اور گل کے ذریعے خصوصی استقبال کیا گیا ـ اس ادبی پروگرام میں مقیم سر اور معین الدین عثمانی صاحب کے علاوہ مقامی لوگوں نے بھی خاصی تعداد میں شرکت کی ـ پروگرام کی نظامت وسیم عقیل شاہ نے جبکہ رسم شکریہ اسلم سر نے ادا کیا ـ